पुणे : पुण्यातील प्रसिद्ध महिला उद्योजक संगीता ललवाणी यांची सार्क चेंबर वूमन आंत्रप्रेन्य़ुअर्स काऊन्सिल (एससीडब्ल्यूईसी) या संस्थेने आपल्या आंतरराष्ट्रीय कार्यकारी परिषदेच्या सदस्यपदी नियुक्ती केली आहे.
‘एससीडब्ल्यूईसी’ ही ‘सार्क चेंबर ऑफ कॉमर्स अँड इंडस्ट्री’ या संस्थेचा एक भाग असून, दक्षिण आशियातील महिलांना सक्षम होण्यासाठी सातत्याने प्रोत्साहन देणे आणि त्यांच्यामधून अधिकाधिक उद्योजक घडविणे, हे या संस्थेचे उद्दिष्ट्य आहे.
‘सार्क चेंबर ऑफ कॉमर्स अँड इंडस्ट्री’च्या महासचिव हीना सईद यांनी संस्थेतर्फे ललवाणी यांना पाठविलेल्या नियुक्तीपत्रात ललवाणी यांनी आतापर्यंत संस्थेसाठी केलेल्या कामाची प्रशंसा केली आहे.
‘‘एससीडब्ल्यूईसी’सारख्या महत्त्वाच्या संस्थेच्या आंतरराष्ट्रीय कार्यकारी परिषदेचे सदस्यत्व प्राप्त होणे हा मोठा सन्मान आणि तितकीच मोठी जबाबदारी आहे. महिलांमध्ये उपजतच उत्साही आणि मेहनती वृत्ती, तसेच धडाडी असते. उद्योजक होऊ पाहणाऱ्या महिलांना योग्य वेळी मदतीचा हात मिळाला, तर त्या खूप चांगली कामगिरी करू शकतात. आता सार्क चेंबर वूमन आंत्रप्रेन्युअर्स काऊन्सिलमध्ये अधिक चांगले काम करून दाखवण्याचा माझा निर्धार आहे,’ अशी प्रतिक्रिया ललवाणी यांनी व्यक्त केली.
ललवाणी या महिला सक्षमीकरणासाठी काम करणाऱ्या विविध व्यासपीठांशी निगडित असून, त्यांनी नुकतेच ‘फेडरेशन ऑफ इंडियन चेंबर ऑफ कॉमर्स अँड इंडस्ट्री’च्या (फिक्की) पुणे महिला शाखेचे अर्थात ‘फ्लो-पुणे’चे अध्यक्षपदही भूषवले होते.
